Azərbaycanda ilk dəfə “Qızıl Qaya-2010” beynəlxalq dağ idmanı festivalı öz işinə başlayıb.

Festivalda Rusiya, Gürcüstan və Macarıstandan da idmançılar iştirak edir.

İNRADİO.AZ Azərbaycan Hava və Ekstremal İdman Növləri Federasiyasının mətbuat xidmətinə istinadən xəbər verir ki, iyulun 15-də Azərbaycanda ilk dəfə olaraq Quba rayonunun Qalaxudat kəndinə yaxın ərazidə “Qızıl Qaya-2010” beynəlxalq dağ idmanı festivalı öz işinə başlayıb. Festival Azərbaycan Hava və Ekstremal İdman Növləri Federasiyasının təşkilatçılığı və Qərb Unversitetinin dəstəyi ilə təşkil olunur.

Proqramda boulderinq yarışlarının keçirilməsi, Şahdağ silsiləsində yerləşən “Heydər zirvəsi”nə sürətli yürüşün təşkili, müxtəlifliyi sevənlər üçün  uzunluğu 1 kilometrdən çox, hündürlüyü 200-300 metrə yaxın olan toxunulmayan qaya divarlarına dırmanmaq və digər tədbirlər nəzərdə tutulub.

Bu tədbirdə Azərbaycan Hava və Ekstremal İdman Növləri Federasiyasının 20 klubunun (Bakı şəhəri və o cümlədən regionlarından Qusar, İsmayıllı, Qax, Gəncə, Daşkəsən, Qobustan rayonlarından) 100-dən çox idmançıları və Azərbaycan Alpinizm Federasiyasının nümayəndələri ilə birgə eyni zamanda Rusiya, Gürcüstan və Macarıstandan da idmançılar iştirak edir. Festival iyulun 18-də başa çatacaq.

Qeyd edək ki, Festivalın keçiriləcəyi bütün ərazi, dar dərələri ilə, toxunulmayan,  qarmaq belə vurulmayan qaya divarları ilə zəngindir. Geniş mədəni proqramı olan festival qeyri-rəsmi ünsiyyət, tanışlıq və müxtəlif ölkələrdən olan idmançılara təcrübə mübadiləsi aparmaq üçün imkanı verəcək. Bu, qonaqpərvər yerli sakinləri, gözəl təbiəti, qayayadırmanan idmançılar və alpinistlər üçün geniş potensial imkanlar açacaq. Federasiya əmindir ki, Buzadırmanma üzrə Birinci Beynəlxalq Turnirdə olduğu kimi, bu mötəbər tədbirdə iştirak edən qonaqlar təşkilatçıların yerli qonaqpərvərlik və mehribanlığını layiqincə qiymətləndirəcəklər.

Təşkilatçılar bütün dağ sevərləri Azərbaycanda ilk dəfə keçiriləcək ”Qızıl Qaya-2010” beynəlxalq dağ festivalına dəvət edir.